Saat baku dapa, seng tau mau biking apa?

Saat pandang mata, cuma lewat foto

Saat bacarita, cuma lewat kata mar seng liat rupa

Saat tasonto rasa, rindunya mita ampun voor nona Ambon.

Bunyi omba labuang Passo, seng bisa pele suara hati

Beta manyanyi lagu rindu dalam hati 

cuma voor ale nona Ambon.

Seng sangka bisa bagini, seng sangka bisa terjadi amper jatuh beta pung hati

Adoee........

Laipose, basangaja biking manis carita

Onosel, bacarita baputar-putar kata

Nona pasti su dapa rasa.

Carita taputar carita nyong malu hati paskali....

Jang bilang kalo hati su tambah dekat

Meski berat rasa, kalau saja ika akang deng tali hulaleng voor jadi kisah

laipose tinggal laipose

Onosel jalan tarus jadi ondos di malam hari..

Nona....

Nyong abis bahasa

Nona....

Nyong gantong hati di batu gantong baku dekat Mangga Dua

Nona....

Nyong amper mati, sama deng Kudamati belum sampe di Passo

Nona....

Nyong rindu paskali dengar suara.

Biarpun nona bilang laipose, 

Nyong seng ambel pusing

Biarpun laipose biking babunga,

Mar hati ini pasti babuah

Babuah di hati jadi bukti, kalo bukang cuma babunga 

Waktu sibu-sibu dapa lia, datang angin tanjong Tial talapas seng jadi arti

Babuah di hati jadi bukti, kalo buah tujuan akhir dari babunga rasa 

Jaga hati, jaga rasa voor jadi buah, karna laipose seng selamanya penuh gombal...

» Read More...