HETU AMPER MALAM; "Maluku Satu"

Onggo baru abis panggayo parau (Rute Galala-Rumah Tiga), karna penumpang jalur Galala su mulai sunyi, Onggo langsung sauh parau di pinggir pante. Pas Onggo mau turun ka darat, dapa lia abang Uceng ada nanaku laki-laki dar jauh, parsis di pinggir pante Rumah Tiga.  "Onggo e...!!" abang Uceng bataria. "Sabar beta kasitu lalu katong dudu hetu sadiki dolo". Lalu dong dua baku dapa; hetu amper malam mulai.

Abang Uceng : Roko sabatang dolo kah.?? (deng rim batumerah kantal)


Onggo              : Adoee, ini kal Pela su minta, beta seng bisa sambunyi lai (Sambil tatawa sangaja, Onggo kasi kaluar djisamsu stenga bungkus. Onggo ini dia pung papa orang Tenggara, lalu mama orang Passo).


Abang Uceng : Jadi jua kah? (Abang Uceng tanya penghasilan Onggo satu hari tadi)


Onggo             : Beta kaluar su laat tadi lai, jadi seng talalu banya o... Cuma dapa 5 kali pulang-bale sa.


Abang Uceng : O bagitu e, jadi juaaa. (Sambil bakar rokok plat kuning sabantang)


Onggo              : Abis tadi malam katong dudu matawana di ontua Kaleb pung teras, bicara "Maluku Satu". Sampe jam 3 tengah malam,  karna beta mau nonton bola Real Madrid deng Ajax beta cuma iko-iko par bagadang saja. Eee, maar dong bicara paleng banya e..!!!! (Onggo terangkan deng satu muka).


Abang Uceng : Iyooooo.. e !!! ini kamareng lai ni??!! (Abang Uceng langsung sambung padahal Onggo balom abis carita). Kamareng dong di Jainal pung muka kintal lai, katong sakawang baku malawang, deng Calon-calon Maluku Satu ni. Beta Kamareng pas mau pulang beta bataria par dong samua di situ, "Iyooo kamong bicara -Maluku Satu- padahal nanti terpilih Ada Dua Orang To?? Mudah-mudahan dua orang ni bajalang jadi satu par katong samua..!!" (Abang Uceng bicara deng aju-aju akang par Onggo bagitu).


Onggo            : Batul Abang Uceng e..!! Katong masyarakat Ambon ni, hobbi paskali e... bicara politik.?? Mulai dari tukang Beca, tukang Ojek, sampe bos-bos di rumah kopi tu. Seng pikir kata beso mau makang apa? bicara politik tarus. Beta heran..!! (Deng satu muka yang terkesan memprihatinkan, Onggo sepertinya kurang srek deng topik "Maluku Satu" yang orang laeng ada sibuk par bicara akang). Bukang beta seng ingin tahu deng bicara politik, tapi beta seng mau bicara akang tarus-tarus sampe biking katong lupa par biking sesuatu par hidop rumah tangga . Iya to Abang to, kah bagaimana??



Abang Uceng : Batul Onggo, ale sama deng beta (Sambil angguk-angguk kapala par Onggo); kamareng sa, beta su pastiu lai, dong su bicara kata Calon ini boleh, calon itu boleh, Calon ini dia kepeng tabal, yang ini tipis, pokoknya rupa-rupa macam. Beta ni bingong lai, dong yang bicara-bicara ni, jang sampe dong samua Intel kaapa?? kong dong bisa tahu, kata dia ini bae deng seng bae?? hehehe  (Sambil Abang Uceng tatawa basar)


Onggo            : Par beta Abang Uceng, sapa yang mau dapa pilih kedepan ni, Musti dia pung hati benar-benar par bangun Maluku. Bukang tarus biking pembangunan yang aneh-aneh, pada hal akang seng terlalu bermanfaat buat Masyarakat; Akang pung contoh satu ni (Sambil tunju ke arah Jembatan Merah Putih yang sementara di bangun). Justru beta jua su simpang-simpang kepeng sadiki par beli alat-alat Bengkel, sebab parsis jambatan ni dia klaar, beta seng susah kio..?? (Sebagai penawar jasa Perahu Jurusan Galala-Rumah Tiga) Beta seng mau jadi orang yang bersungut di beso-beso, gara-gara pemerintah pung keputusan yang keliru


 Abang Uceng : Beta setuju deng ale pela e.. Beta pung hati kacil ni berharap, deng berdoa tarus, supaya pemimpin di Maluku ni ke depan, jang talalu dong ambel kepeng rakyat buat makang akang lai. Sebab dong pung gaji ada tu?? lalu kaya katong yang seng pung kepeng ni,  kira-kira mau berharap perbaikan katong pung hidop kedepan di sapa?? Kal Bukang pemerintah saja to? ka bagaimana Onggo?? (Abang Uceng sepertinya begitu serius mengucapkan hal ini buat Onggo).


Onggo                :  Itu akang sudah Abang Uceng e. "Orang Ambon Bilang, masing-masing deng dia pung tiap-tiap", jadi muda-mudahan katong samua kedepan seng salah pilih pemimpin. Yang paleng penting katong pung hidop basudara ni katong jaga akang tarus bae-bae, sambil katong samua bangong maluku, mulai dar katong pung ana-ana kio Abang Uceng (Sambil minta gasteker dari Abang Uceng, Onggo bakar sabatang kombali).


Abang Uceng  : Alhamdulilah..!! (Sambil tarus liat Onggo yang masih lanjut bicara)


Onggo               : Maksud beta di dalam Maluku basar ni, ada puluh ribu orang, samua pung pilihan beda-beda, jadi beruntung kalau katong pung pilihan deng katong pung pikiran par calon tu akang benar (sama di kemudian hari), maar kalo seng benar?? lalu katong mau kasih salah sapa? tapi yang benar par beta di hari ini, katong jadi benar par diri sandiri dolo, pasti akang pung benar tu kaluar par orang laeng. Hari ini kal Abang Uceng pung kacil ada 3 tu, ajar dong par jadi orang Maluku yang benar, bagitu jua deng beta lai pasti Orang Maluku tambah maju kedepan. Jang katong hari ini tinggal kasih salah orang tarus, mar seng perna sadar diri sandiri. Abang lia ni (sambil tunju sampah plastik yang talamburang di pinggir pante), katong saja buang sampah sabarang kiri kanang, akang su biking rusak katong pung pante bagus ni, lalu bagaimana katong mau bicara biking bae Maluku kedepan?


Abang Uceng    : Pela ale pung kata-kata ni akang seng salah. (Sambil basangaja, Uceng aju-aju mau manangis ) Memang batul katong samua mau Maluku ni kombali jadi bae, jadi samua hal katong musti mulai dar hal-hal kacil yang Pela su bilang akang tu. Deng beta tamba satu saja jua, Maluku mau jadi bae, harus orang Maluku tambah bae dalam samua hal. Termasuk katong pung hidop basudara ni, musti katong laeng sayang laeng to.


Onggo                 : Itu sudah Abang e..!! 

Sambil Abang Uceng ada balas Onggo pung bicara, muncul di samping Iful (Abang Uceng pung kacil yang bongso) yang datang bawa pasang kata abang Uceng pung Maitua ada panggel
Maka hetu amper malam abis sampe situ.


Abang Uceng    : Ado Onggo e, beta pung kacil ni dia su datang panggel mangkali, sorri e, nanti katong sambung kombali beso-beso jua e. (Sambil pegang  Ipul pung deng arah menuju jalan pulang)


Onggo               : Iyo Pela e, seng apa-apa o, kapan-kapan lai katong ada waktu macang bagini lai kah?? (Sambil menawarkan rokok sabatang par bakal  Abang Uceng, Onggo langsung pikol panggayo baku bage jalan).


Abang Uceng   : Danke Banya lai..  Salamat ..!!!






Penulis Naskah  : Jimmy Pattiasina

Tempat                : Jelambar, Jakarta Barat
Waktu                  : 04 Oktober 201219.38 WIB   

0 comments :

Post a Comment

Dengan Senang Hati Beta Menanti Basuara Sudara-Sudara.

Video Profile Negeri Booi

Selamat datang di blog TRADISI MALUKU.. Semoga bermanfaat bagi anda!!