GULA-GULA SU DAPA BAGE


Dari timor tanpa matahari nae
Bobou anyer ikang dalam darah, tabungkus lautan biru biking kariting rambu

Rampah-rampah kas karas mayat
konon cengkeh deng pala saudagar pung suka-suka
konon negeri raja-raja tasiar ka ujung bumi, tinggal nama malintang karna jakarta

Mangapa tinggal sacubi
Mangapa tinggal saloko
Mangapa tinggal saontal
Batu itang su jadi lombo seng sangka dapa tipu

Woe..!!!!
Jang baku hela rotang
Jang iko mat babunyi tipa jawa
Bangsa jual bangsa
Dapa doti deng gula-gula

Woe...!!!
Sempe tampa papeda sagu tumpa jatuh di atas lesa
Bukang aer uanau mar akang batali.
Seng tacere jujaro mungare
Itu tabiat ilahi, inga akang sampe mampos

Arika..!!!

Arika..!!!

Gula-gula sudapa bage
Biking mulu manis
Mar ludah karing di tanah, dalam mulu salobar kombali
Lebe bae bagia deng surut
Lebe bae biji doriang asar di atas parapara

Biar kasiang, berharga di hati
Biar Jauh di mata dekat di hati
Pela deng gandong mari katong badati
Jang lupa itu jaga akang sampe mati.

By : [S.A.95] J.Pattiasina























2 comments :

febry said...

luar biasa,
akang pung makna dalam paskali

makasih lai su tulis ini
salam kenal jua pak.

*blogger maluku*

Jimmy Pattiasina said...

Dangke gandong.... su singgah par mangente blog ini, deng su kasih suara voor beta.

Beta yakin generasi Maluku harus laeng kase inga-inga laeng kalo Maluku harus di benahi dalam banya hal...

Hormate..!!!!

Post a Comment

Dengan Senang Hati Beta Menanti Basuara Sudara-Sudara.

Video Profile Negeri Booi

Isi Kamboti

Tampa Kaki

Selamat datang di blog TRADISI MALUKU.. Semoga bermanfaat bagi anda!!